काठमाडौं । जारी युरोकप फुटबल अन्तर्गत गएराति भएको खेलमा उपाधिको दाबेदार इटाली रिपब्लिक अफ आयरल्याण्डसँग पराजित भएको छ ।समूह चरणको अन्तिम खेलमा आयरल्याण्डले इटलीलाई १–० गोल अन्तरले हराउँदै उपविजेता बनेर अन्तिम १६ मा प्रवेश गरेको हो । आयरल्याण्डको जितमा ८५ औं मिनेटमा ब्राडीले गरेको गोल निर्णायक बन्यो । हारपछि पनि इटाली भने समूह इ को विजेता बनेको छ । इटालीलाई कडा टक्कर दिएको आयरल्याण्डले अब अन्तिम १६ मा समूह ए को विजेता फ्रान्ससँग खेल्नेछ । यस्तै इटालीले स्पेनसँग खेल्नेछ ।
यसैबीच, पहिलो सहभागितामै समूह उविजेता बन्दै आइसल्याण्ड युरोकप फुटबलको नकआउट चरणमा प्रवेश गरेको छ । गएराति भएको समूहको आफ्नो अन्तिम खेलमा आइसल्याण्डले अस्ट्रियालाई २–१ ले हराउन सफल भयो ।
उसले समूह एफको उपविजेताको रुपमा अन्तिम १६ मा स्थान बनायो । अन्तिम १६ मा आउँदो सोमबार आइसल्याण्डले समूह बीको उपविजेता इंग्ल्याण्डसँग खेल्ने छ । आइसल्याण्डलाई महत्वपूर्ण जित दिलाउन इन्जुरी समयमा आरनोर इनग्भी ट्रउस्तासनले गरेको गोल निर्णाक बन्यो । आइसल्याण्डले १८ मिनेटमा जोन डाडी बोड्भार्सनले गोल गरेपछि सुरुवाति अग्रता लिएको थियो । तर ६० औं मिनेटमा एलेसान्ड्रो सोफले अस्ट्रियाका लागि बराबरी गोल फर्काए । १–१ को बराबरीमा पुगेको अवस्थामा आइसल्याण्डका आरनोरले इन्जुरी समयमा गोल गर्दै जित दिलाए । हारसँगै अस्ट्रिया समूह चरणबाटै बाहिरिएको छ । त्यस्तै, गएराति नै भएको अर्को खेलमा पोर्चुगल बराबरीमा रोकिएको छ । पोर्चुगल हंगेरीसँग ३–३ को बराबरीमा रोकिएको हो ।
बराबरीपछि पनि पोर्चुगल उत्कृष्ट तेस्रोमा पर्दै अन्तिम १६ मा पुगेको छ । हंगेरी भने समूह एफको विजेता बन्दै नकआउट चरणमा स्थान बनाएको हो । हंगेरीसँगको खेलमा रोनाल्डोले गोलको खडेरी तोडे । पोर्चुगलका तीनै गोलमा रोनाल्डोको भूमिका महत्वपूर्ण रह्यो । दुई गोल रोनाल्डो आफैले गरे भने एक गोलका लागि नानीलाई सहयोग गरे । १९ औं मिनेटमा जोल्टान गाराले हाफ भलि गोल गर्दै हंगेरीलाई सुरुवाति अग्रता दिलाए । तर ४२ औं मिनेटमा रोनाल्डोको पासमा नानीले पोर्चुगलका लागि बराबरी गोल फर्काए । 
दोस्रो हाफको सुरुमानै हंगेरीका बेलास डज्सुडसकले गोल गर्दै फेरि अग्रता दिलाए । तर त्यसको तीन मिनेटपछि नै रोनाल्डोले व्यक्तिगत पहिलो गोल गर्दै पोर्चुगललाई २–२ को बराबरीको अवस्थामा ल्याए । ५५ औं मिनेटमा डज्सुडसकले व्यक्तिगत दोस्रो गोल गरेपछि खेलमा हंगेरीले फेरि अग्रता लियो । तर रोनाल्डोले यो अग्रता धेरै समय टिक्न दिएनन् । अघिल्ला खेलमा गोल गर्न नसकेको भनेर आलोचना खेपेका रोनाल्डोले टिमलाई चाहिएका बेला महत्वपूर्ण गोल गरे र हारबाट जोगाए । रोनाल्डोले ६२ औं मिनेटमा व्यक्तिगत दोस्रो गोल गरेपछि खेल ३–३ को बराबरीमा सकियो । हंगेरीले अन्तिम १६ मा समूह इको उपविजेता बेल्जियमसँग खेल्नेछ । यस्तै पोर्चुगलले समूह डीको विजेता क्रोएसियासँग खेल्ने छ ।
यस्तै, गएराति नै भएको अर्को खेलमा बेल्जियम पनि युरोकप १६ मा पुगेको छ । आफ्नो अन्तिम खेलमा बेल्जियमले स्वीडेनलाई १–० ले हराएर समूह इको उपविजेता बन्दै नकआउट चरणमा स्थान पक्का गरेको हो । पराजित भएको स्वीडेन भने समूह चरणबाटै बाहिरिएको छ ।
बेल्जियमको जितमा राजा नाइनगोलानले ८४ औं मिनेटमा २५ यार्डबाट गरेको गोल नै निर्णायक बन्यो । हारसँगै स्वीडेन बाहिरियो भने कप्तान जाल्टन इब्राहिमोविचको राष्ट्रिय टिमको अन्तिम खेल पनि यही बन्यो । इब्राहिमोविचले युरोकपपछि राष्ट्रिय टिमबाट नखेल्ने घोषणा गरिसकेका छन् । बेल्जियमले अब अन्तिम १६ मा समूह एफको विजेता हंगेरीसँग खेल्नेछ ।
0 Comments