Ticker

6/recent/ticker-posts

राजदूत नियुक्तिमा ढिलाई नगर्न सरकारलाई समितिको निर्देशन

काठमाडौ, माघ ।
व्यवस्थापिका संसदको अन्तर्राष्ट्रिय सम्बन्ध तथा श्रम समितिले राजदूत रिक्त भएका मुलुकमा तत्काल नियुक्त गर्न सरकारलाई निर्देशन दिएको छ । सिंहदरबारस्थित समितिको कार्यालयमा मंगलबार बसेको बैठकले राजदूत रिक्त भएका मुलुकमा पुगेका नेपालीले धेरै दुःख पाइरहेको भन्दै तत्काल नियुक्त गर्न निर्देशन दिएको हो ।
बैठकमा समितिका सदस्यहरुले सरकारले राजदूत नियुक्त गर्न ढिलाई गरेका कारण अन्तर्राष्ट्रियस्तरमा नेपालको छवि नराम्रो बन्दै गएको भन्दै सरकारको ध्यानाकर्षण गराएका थिए ।
बैठकमा सहभागी परराष्ट्रमन्त्री डाक्टर प्रकाशशरण महतले भने रिक्त भएका राजदूत नियुक्तिको गृहकार्य भइरहेको जानकारी दिए । उनले अब छिट्टै राजदूत नियुक्त गर्ने दावी समेत गरे ।
पराष्ट्रमन्त्री डा. महतले राष्ट्रिय आवश्यकतामा केन्द्रित रहने नीति सरकारले लिएको भन्दै राष्ट्रिय हितमा प्रतिकूल असर पर्ने गरि कुनै पनि राष्ट्रसँग सन्धि–सम्झौता नगर्ने स्पष्ट पारे ।
भारत सरकारको सहयोगमा निर्माण हुने भनिएका आयोजनाले निरन्तरता नपाएको विषयमा छलफल गर्न दुवै राष्ट्रका उच्च अधिकारीहरुबीच छलफल भइरहेकाले छिट्टै सकारात्मक परिणाम आउने विश्वास परराष्ट्रमन्त्री महतको छ ।
परराष्ट्रमन्त्री डा. महतले प्रधानमन्त्री पुष्पकमल दाहालको भारत भ्रमणपछि दुई देशबीचको तिक्तता समाप्त भएको दाबी पनि गरे । उनले छिमेकी राष्ट्र चीनसँगको सम्बन्धलाई पनि सुदृढ गर्नेतर्फ पहल भइरहेको र चीनले सीमा नाका खोल्ने प्रतिबद्धता व्यक्त गरिसकेको जानकारी दिए ।

Post a Comment

0 Comments