Ticker

6/recent/ticker-posts

सप्तरी घटना अपडेटः तीन जनाको मृत्यु

काठमाडौं– एमालेको मेची–महाकाली अभियान अन्तर्गत सोमबार सप्तरीमा भएको कार्यक्रममा मधेसी मोर्चाले विरोध प्रदर्शन गरेपछि प्रहरीले चलाएको गोली लागेर तीन जनाको मृत्यु भएको छ । सप्तरीको राजविराजमा मधेशी मोर्चाका कार्यकर्ता र प्रहरी बीचको झड्पमा गोली चलेको हो। प्रहरीको गोली लागेर मोर्चाका ३ जना कार्यकर्ताको मृत्यु भएको  छ ।
मोर्चाका नेता एवं राष्ट्रिय मधेश समाजवादी पार्टीका सचिव गजेन्द्र मण्डलका अनुसार सप्तरीको मलेठमा पान पसल गर्दै आएका रञ्जन मेहताको मृत्यु भएको छ । त्यस्तै घाइते दुई जनालाई उपचारका लागि धरान लिएर जाँदै गर्दा बाटोमा मृत्यु भएको जनाइएको छ । मृत्यु हुनेमा दिगम्बर यादव रहेको छ भने अर्का एक जनाको नाम खुल्न बाँकी छ ।
मृतकमध्ये एक जनाको पेटमा र एकजनाको छातीमा गोली लागेको छ । उनीहरुलाई राजविराज फिर्ता ल्याइएको छ । ‘घाइते मध्ये छ जनालाई धरान लैजाने क्रममा दुईजनाको मृत्यु भएको छ । दुई जनालाई राजविराज फिर्ता पठाएर बाँकीलाई धरान पुर्याइँदैछ,’ मोर्चाका एक स्थानीय नेताले भने ।
यसअघि सप्तरीका प्रमुख जिल्ला अधिकारी उद्धव तिमल्सिनाले आफूलाई एक जनाको मृत्यु भएको खबर आएको बताएका छन् । मोर्चातर्फ ११ जना घाइते रहेकोमा तीन जनाको अवस्था गम्भिर रहेको र घाइतेहरुको गजेन्द्र नारायण अञ्चल अस्पतालमा उपचार भइरहेको बताइएको छ । दोहोरो झडपका क्रममा २० जना प्रहरी पनि घाइते भएको जनाइएको छ ।
सप्तरीको राजविराजका भएको झडपका क्रममा मधेसी मोर्चाका कार्यकर्ताले पेट्रोल बम हान्न थालेपछि गोली चलाउनु परेको प्रहरीले बताएको छ । एमालेको कार्यक्रम स्थलमा जाने प्रयास गर्दा मधेसी मोर्चाका कार्यकर्ता र प्रहरीबीच दिनभर पटक–पटक झडप भएको थियो ।

एमालेको मेची महाकाली अभियान ३ दिनका लागि स्थगित
राजविराजमा प्रहरीको गोली लागेर २ जनाको ज्यान गएपछि एमालेले मेची महाकाली अभियान ३ दिनका लागि स्थगित गरेको छ ।
सप्तरीको रुपनगरमा आकस्मिक रुपमा बसेको एमाले स्थायी समिति बैठकले मेची महकाली अभियान ३ दिनका लागि स्थगित गर्ने निर्णय गरेको एमाले उपाध्यक्ष भीम रावलले जानकारी दिनुभयो ।
घटनाक्रम असहज ढंगले अघि बढेकाले परिस्थितिको मुल्यांकन गरेर अघि बढ्ने एमालेले जनाएको छ । संसदीय लोकतन्त्रमा सभा सम्मेलन गर्न पाउने अधिकारलाई बिथोल्न खोज्नु आपत्तिजनक भएको ठहर पनि एमालेले गरेको छ ।

Post a Comment

0 Comments