घोडे जात्रा भव्य बन्यो (फोटो फिचर)

काठमाडौं, चैत– काठमाडौं उपत्यकामा विभिन्न कार्यक्रम गरी घोडे जात्रा मनाइएको छ । टुंडिखेलको दक्षिणपूर्व रुखमा बस्ने गुरुमापा नामक राक्षसको आत्माले बालबालिकालाई दुःख नदेओस भन्दै घोडाको टापले कुल्चेर उक्त राक्षसलाई दबाउन यो जात्रा मनाउने प्रचलन छ । 

पछिल्लो समय आएर घोडेजात्रालाई नेपाली सेनाले पनि सैनिकमञ्च टुँडिखेलमा विशेष रुपमा मनाउन थालेको छ । यो वर्षको घोडेजात्रामा पनि नेपाली सेनाले गत वर्षमा झै टुँडिखेलमा अश्वकला प्रदर्शन ग¥यो ।  सेनाले टाँगन घोडा दौड, चार्जर घोडा दौड, ग्रुप टेण्ट पेगिङ, लान्स हिट प्याक शो जम्प, हंगेरीयन पोष्ट, फायर जम्पलगायत विभिन्न २१ किसिमका अश्वकला प्रदर्शन गरेको थियो ।

सैनिक मञ्चमा सेनाको अश्वकला हेर्न राष्ट्रपति, उपराष्ट्रपति, प्रधान न्यायाधीश, मन्त्रीगण, सुरक्षा निकायका प्रमुख तथा सरकारका उच्च अधिकारी सैनिकमञ्च पुगेका थिए । विशिष्ट व्यक्तिहरु मात्रै होइन सर्वसाधारणले पनि घोडेजात्रालाई अवलोकन गरेका थिए ।