उज्वेकिस्तानसँग साेमबार भिडन्त, युएइसँग नेपाल पराजित

काठमाडौं, १ साउन । एएफसी २३ वर्षमुनिको च्याम्पियनसिप छनोटमा नेपाल युएईसँग ५–० गोल अन्तरले पराजित भएको छ । गएराति भएको खेलमा नेपालले गोल गर्ने केही अवसर पाए पनि त्यसलाई सदुपयोग गर्न नसक्दा पराजित भएको हो । एएफसी २३ वर्षमुनिको च्याम्पियनसिप छनोटमा नेपालले शनिबार पहिलो खेल संयुक्त अरब इमिरेट्ससँग खेलेको हो ।
पहिलो हाफमा ४–० ले पछि रहेको नेपालले दोस्रो हाफमा १ गोल खाएको हो । युएईसँग नेपालले ३३ वर्षपछि खेलेको हो । सन् १९८४ मा एशियन कप छनोटमा एक पटक युएई र नेपाल आमनेसामने भएका थिए । त्यसबेला नेपाल युएईसँग ११–० गोलले अन्तरले पराजित भएको थियो । प्रतियोगिताको समूह डिमा रहेको नेपालले सोमबार उज्वेकिस्तानसँग र बुधबार लेबनानसँग खेल्नेछ । अर्को वर्ष चीनमा हुने एएफसी २३ वर्षमुनिको फुटवल च्याम्पियनसिपको छनोटमा सहभागी ४० टोलीलाई १० समूहमा विभाजन गरिएको छ । प्रत्येक समूहका समूह विजेता र १० समूहका उत्कृष्ट पाँच उपविजेता टोली फाइनलको लागि छनोट हुनेछन् ।