Theme images by kelvinjay. Powered by Blogger.

Slider

Recent Tube

देश

प्रविधि

कला साहित्य

विदेश

खेल

फेसन

मोरङ, ४ माघ । प्रदेश नम्बर १ को अस्थायी मुकामका रुपमा विराटनगरलाई तोकेपछि त्यहाँका स्थानीयले सरकारको यस निर्णयलाई  दीपप्रज्वलनसहित स्वागत गरेका छन् । सरकारले प्रदेश नं १ को अस्थायी मुकाम विराटनगरलाई तोकेपछि बुधबार साँझ विराटनगरवासीले खुशियालीमा दीप प्रज्वलन गरेका हुन् । विराटनगर महानगरपालिका प्रमुख भीम पराजुली र उपप्रमुख इन्दिरा कार्कीले विराटनगर महानगरपालिकामा दीप प्रज्वलन गरी सरकारको यस कदमलाई स्वागत गर्नुभएको हो । 

सो अवसरमा प्रमुख भीम पराजुलीले विराटनगर अस्थायी मुकाम भएकोमा खुशी प्रकट गर्नुहुँदै ऐतिहासिक नगरी सबै पूर्वाधारयुक्त विराटनगरलाई अस्थायी मुकाम बनाउनका लागि लामो समयदेखि गरिएका प्रयास सफल भएको बताउनुभयो । यसका साथै विराटनगरको मुख्य बजार, ट्राफिकचोक, महेन्द्रचोकलगायत विभिन्न ठाउँमा दीप प्रज्वलन गरी स्वागत गरिएको थियो । 

बुधबार बसेको मन्त्रिपरिषद्को बैठकले विराटनगरलाई प्रदेश नं १ अस्थायी मुकाम तोकेको हो । ऐतिहासिक नगरी विराटनगरमा अस्थायी राजधानी हुनुपर्ने सबै पूर्वाधार विद्यमान रहेकाले सरकारको यो निर्णय न्यायपूर्ण भएको भनेर विभिन्न क्षेत्रका व्यक्तिले सोही अनुरुप आ–आफ्ना विचार व्यक्त गरेका हुन् । 

नेकपा एमाले मोरङ अध्यक्ष विनोद ढकालले विराटनगरलाई प्रदेश नं १ को अस्थायी मुकाम तोकेको कार्यलाई हार्दिक स्वागत गर्नुभएको छ । उहाँले विराटनगरमा सबै पूर्वाधार रहेकाले विराटनगरबाहेक अन्यत्र विकल्प नरहेको स्पष्ट पार्नुभयो ।

नेकपा माओवादी केन्द्र मोरङका नेता गोपी अछामीले विराटनगरलाई अस्थायी राजधानी बनाउने कार्य अत्यन्त राम्रो भएको प्रसङ्ग उल्लेख गर्दै मिश्रित बसोबास भएको, सीमावर्ती क्षेत्रका पिछडिएका वर्ग, उत्पीडित जाति, आदिवासी जनजातिलगायत सबैको उत्थानमा सहयोग पुग्ने विश्वास प्रकट गर्नुभयो । 

संघीय समाजवादी फोरम नेपाल, मोरङका अध्यक्ष राजकुमार यादवले सरकारको निर्णय स्वागतयोग्य रहेको र ऐतिहासिक नगरी विराटनगर लगायतका क्षेत्रको विकासमा थप बल पुग्ने धारणा प्रकट गर्नुभयो । 

मोरङ व्यापार संघका अध्यक्ष पवन शारदाले प्रत्येक दृष्टिकोणबाट विराटनगर अस्थायी राजधानी हुनुपर्ने थियो, राजा विराटको राजधानी, औद्योगिक नगरीका साथै स्वास्थ्य, शिक्षा, समानुपातिक तथा समावेशी आधारमा पनि विराटनगरबाहेक अन्य विकल्प नरहेको बताउनुभयो । 


––– 

«
Next
Newer Post
»
Previous
Older Post

No comments:

Leave a Reply